မေသဇင်ချစ်က လတ်တလောမှာတော့ နာမည်ကြီးတဲ့ ကြော်ငြာမင်းသမီးဖြစ်နေပါပြီ။ ဟာသသရုပ်ဆောင်ပီယနဲ့အတူတူ သရုပ်ဆောင်ခဲ့တဲ့ကြော်ငြာလေးကလည်း အောင်မြင်သွားခဲ့တာကြောင့် အားလုံးက ဝမ်းသာနေခဲ့ကြပါတယ်။ ပီယနဲ့ မေသဇင်ချစ်တို့က ကြော်ငြာထဲမှာလည်း အတွဲညီညီသရုပ်ဆောင်နိုင်ခဲ့ပါတယ်။ ကြော်ငြာကို တစ်ခြမ်းစီရိုက်ပြီးမှ ဆက်တာဖြစ်ပေမယ့်လည်း တစ်ချိန်တည်းရိုက်ကူးထားတယ်လို့တောင် ထင်နေရပါတယ်။ ပီယနဲ့ မေသဇင်ချစ်က ရုပ်ချင်းကလည်း ဆင်တာကြောင့် တကယ့်သားအဖလားလို့ ထင်နေကြပါတယ်။
ပီယက မေသဇင်ချစ်ရဲ့ဗီဒီယိုလေးတွေကိုလည်း အမြဲအားပေးသူပါ။ သူ့ရဲ့ဗီဒီယိုတွေထဲမှာ အလင်းအားက နည်းနေတာကို ပီယက သတိထားမိပါတယ်။ မေသဇင်ချစ်ရဲ့အဖေ ကိုချစ်ဦးကို မေးကြည့်တဲ့အခါမှာတော့ ဖုန်းမကောင်းတာလည်း ပါဝင်သလို သူတို့ရွာမှာ မီးမရသေးတာကြောင့်လည်း အလင်းအားနည်းတယ်လို့ ဆိုပါတယ်။ ရွာမှာ မီးမရသေးတာကြောင့် မေသဇင်ချစ်တို့က ညဆိုရင်ဖယောင်းတိုင်မီးနဲ့ပဲ စာကြည့်ရပါတယ်။ သူတို့အဖေကတော့ အခုနောက်ပိုင်းမှာ ဘက်ထရီမီးလေး ဆင်ပေးထားတယ်လို့ ဆိုပါတယ်။
ပီယက မေသဇင်ချစ်တို့အတွက် စိတ်မကောင်းဖြစ်သွားပြီးတော့ သူ့ရဲ့အနုပညာကြေးထဲကနေ ၅ သိန်းကို မုန့်ဖိုးပေးလိုက်ပါတယ်။ အဲဒီ ၅ သိန်းနဲ့ မီးကောင်းကောင်းလေး ဆင်လို့ရအောင်လို့ ပီယက ပညာပါရမီဖြည့်ပေးလိုက်တာပါ။ ပီယကိုယ်တိုင်ကလည်း ဒီအနုပညာကြေးလေးတွေကို စုထားတာဖြစ်ပြီးတော့ သူဒီလတော့ ချွေတာပြီးတော့ သုံးလိုက်မယ်လို့ စိတ်ကူးထားပါတယ်။
မေသဇင်ချစ်တို့ ညီအစ်မတွေ စာကျက်တဲ့အခါမှာ လင်းလင်းရှင်းရှင်းကျက်နိုင်ဖို့နဲ့ သူ့ရဲ့ဗီဒီယိုလေးတွေကိုလည်း ထင်ထင်ရှားရှားကြည့်နိုင်အောင်လို့ ပီယက တတ်နိုင်တဲ့ဘက်ကနေ ကူညီပေးလိုက်တာဖြစ်ပါတယ်။ ပီယရဲ့စိတ်ထားကောင်းလေးကြောင့် လူအများကတော့ သူ့ကို ချီးကျူးနေကြပါတယ်။ဖယောင်းတိုင်နဲ့စာကြည့်ရတဲ့မေသဇင်ချစ်အတွက် ကူညီပေးခဲ့တဲ့ ပီယလည်း ဒီထက်ပိုပြီးအောင်မြင်စေဖို့ ဆုတောင်းပေးလိုက်ပါတယ်။
